jaor van oetgaaf: 2005

leukheidsfactor:  
 
Frank en Paultje komme mit de sjrik vriej!
 

'Waat ein gelök höbbe weer gehadj', aldus Frank naodet d'r mit de traumahelicopter is gelandj in het Pejjer landj. Auch Paultje sjötj naeknikkendj ziene kop, 'wiej is het mögelik det zoaget gebäördj'.

Het woor eine sjoane vriedigmiddig in fibberwarie. Frank en Paul hawwe allebei eine snipperdaag gepaktj, want het stong al waeke op de planning: deze vriedig zoewe ze verkledj de kroegen in Remunj aafgaon en det in de nuujgekochte vastelaoveskleier.

Zoa gezag, zoa gedaon: op en top woore ze om 14.00u lokale tied aangekomme oppe staasje in Remunj. De minse keeke waal get vraemdj, mer door de net-opgedronke 1,5 liter fles Bacardi deerdje det de twië neet mië.

De sfeer zoot d'r al lekker in en de iëste twië kroege ginge ze den auch in rap tempo aaf. Het nuëdige beer waerdje achteräöver gehouwe totdet ze opèns wiej eine gek moste pisse (correctie: nao de wc mooste). Al rennendj vlooge ze de kefée oet, neet weitendj wo ze oet zoewe komme. Door de beerkes en de laeg fles Bacardi wiste ze al neet mië wo ze haer ginge en per ongelök pakdje ze de trein terök nao Ech.

Mit get elastiekskes en get plekbandj wiste ze de boel onger op slaot te goaje waat hun get tied goof om eine sjoan wc te vènje. Al rennendj koome ze de trein in Ech oet, onger de spaorbuim door, de waeg op. Zonger nao te dènke zatte ze het op ein loupe. De twië woore zoa zaate det ze van väör neet mië wiste waat ze van achter woore.

Al rennendj koome ze biej de kènjerboerderiej van Pepijn oet wo Paultje tot zien verbazing ein aopenbaar toilet zoog staon. Frank dach direct aan eine fata morgana aangezeen ze al zon half oer geine dröppel beer mië hawwe gehadj. Paultje huërdje hem nog neet aan en woor al äöver het hèk geklomme om zien boadjap in de wc te doon. Frank volgdje vlot en het geklaater woor tot op de Slek te huëre.

Al lachendj en zeikendj begooste ze te vertèlle waat ein grap det toch neet woor; dao stonge ze den op de kènjerboerderiej biej de Pepijn. Het gelach doerdje korter den verwach, toen Frank plotseling oug in oug koom te staon mit de nuuje aanwèns van de boerderiej: eine mènkes buffel oet Afrika.

De twië wiste neet wiej vlot ze aaf koste kniepe om het vervolgens op ein renne te zitte. De buffel leet het d'r echter neet biej zitte en zoot de achtervolging in. Mit ongekèndje snelheid raasdje de twië door de drèk in de dierentuin. Helaas woor de snelheid te hoag om fatsuunlik äöver het hèk te kenne sprènge en dus höbbe diej 2 zon oer motte renne, totdet plotseling de traumahelicopter hen koom redde.

Mit ein sierlik touw zeen oeteindelik de twië verkledje fieësgèngers geredj oet de klawwe van de buffel. Ein avontuur om noats mië te vergaete.

'Wer zulle in het vervolg mer in de wc van de kroeg zelf gaon pisse', zaetj eine bibberendje Paultje. Mörgenaovendj doon de twië hun verhaol biej Hart van Nederlandj, wo altied van zon (belachelikke) ongerwerpe biejkomme.

 

Frank en Paul op de plaats des onheils...
Repke Tepke 2009 (Bart Golsteijn - thambar@xs4all.nl)