jaor van oetgaaf: 2005

leukheidsfactor:  
 
Niels de poolman
 

Niels Golsteyn haef sinds aafgeloupe zondig eine nuuje biejnaam: Niels de Poolman. Dit kömtj omdet hae ein nuuj waereldrecord haef neergezatj in Alaska. Hiej haef hae mer leefs 26 oer en 12 menuut in allein ein strang ongerboks gestange mit 2 gewichte in zien henj van allebei 2,5 kilo. Dit is ein nuuj unieke prestasie woväör hae den auch ein vermeljing krigtj in het Guiness Book of Records & Ape.

Niels is aafgeloupe zaoterdig mit de trein nao Alaska gegange in het gezèlsjap van zien vriendin Janou(ke) en de Pejjer pers. Nao 12 oer reize, wo-van 5 oer vertraging op de staasje van Ech, is d'r werm (figuurlik) opgevange door ein eskimofamilie in het noordelik deil van Alaska. Hiej höbbe ze de nach doorgebrach in eine super-deluxe-Iglo mit aorconditioning, 5-persoansbèdde en ein minibar oppe kamer mit vaste tap wo wèrm mèlk mit honing oetkoom. Nao ein gezellige nach woor den eindelik de daag van de waorheid aangebraoke: de daag van zien recordpoging.

Het awd record stong op naam van eine B. Vergoossen, dae het mer 5 menuut vol hej gehaoje omdet zien oare bevraore woore (gein commentaar). Niels woor den auch vastberaoje om det record te verplettere. Nao einmaol zien strang ongerboks aan te höbbe gedaon, geliëntj van Bart Sevriens, haef d'r nog zon half oer rek-en-strek oefeningen gedaon, alväöres te beginne.

Om 11.11 Alaskaanse tied precies, is d'r begos mit de recordpoging, gesteundj door de massaal oetgeloupe lokaal bevolking, Janou(ke) en de Pejjer Pers. Zoa-es ger waarsjienlik al gelaeze höbs haef Niels het mer leefs 26 oer en ein klats menuut volgehaoje in waer en wèndj.

Niels: 'väöral de aovendj woor moeilik. Toen begoos de lokaal bevolking pas ech los te komme en koom de jägermeister en de frikkedelle op taofel'. 'Ich höb toen effe op mien luppe motte biete', aldus Niels. De dokter is d'r daonao nog aan te pas motte komme, aangezeen Niels zien ongerlup doorgebeete haw. Hiej haw d'r namelik gein geveul mië in door de kaoj..

Nao 26 oer en 12 menuut vonj Niels het good gewaes en toen haef d'r het bielke d'r biejneer gegoadj. Hae koos nog waal doorgaon, mer wol de sjoan film op de tillevisie 's aoves neet misse. Janou woor apetrots op hem en goof hem den auch ein dikke kus. Helaas väör Niels woor zien lup nog  neet geheildj en toen sjrièfdje hae den auch alles biejien. Nao nog eine lekkere werme sjokkemel te höbbe gedronke zeen ze den auch terökgereisj nao Pey.

Het record van Niels is terök te laeze in het Guiness Book of Records & Ape op bladzijde 1027, regel 12-13.

 

Hiej Niels al in de weer mit zien gewichte in Alaska
Repke Tepke 2009 (Bart Golsteijn - thambar@xs4all.nl)