jaor van oetgaaf: 2006

leukheidsfactor:  
 
Reserve-teletubbie Yvonne sluitj aan
 

Dit artikel is gebaseerdj op ein waorgebäördj sprookje....

Lang lang geleeje (eine dikke maondj geleeje dus) zoote de Teletubbies, bekèndj van tillevisie, te kaarte in hun geheime hoofdkwarteer in Engelandj. Ze kaardje de gans goddelijke daag door en d'r ginge den auch de nuëdige drènkskes en chips doorhaer. Tot dae teletubbie mit det roze pekske zich grandioos verslikdje in eine paprika chips mit unne-en-kieësjmaak. D'n angere teletubbie mit det gael pekske dach neet lang nao en begoos op de boek van dae mit det roze pekske te sprènge. Nao zo'n half oer te höbbe gesprônge zoog dae teletubbie mit det roze pekske toch waal ein bietje blaw. Mer gelökkig: dao vloog det chipske der al oet...gevolgdj door diej anger chipsjes diej ze de ganse daag hawwe geaete. Getsie....

Mer det woor nog neet het ergste! Ze mooste deznaovendj ein knaloptraeje gaeve op de Bontje Aovendj van de Vastelaovesvereniging vanne Slek! Mer wiej moos det mit dae van det roze pekske?

Dae teletubbie mit de blaw pekske haw ein grandioos idee: ze mooste emes vènje waat het reservepèkske van dae mit det roze pekske zoew passe! Want det pèkske hong nog inne kas.....!

Zoa gezag, zoa gedaon. Dae mit det greun pekske haoldje het reserver-roze-pekske oet de kast. Mer noe? Waem moos det noe toch aan doon? Dae mit det blaw pekske vonj det ze mer langs de däöre mooste gaon om eeder maedje te vraoge om het pekske te passe. Het maedje det het pekske wiej gegaote zoew passe, kreeg ein deenblaad beer en zoew 's aoves optraeje oppe Bontje Aovendj van de Slek es de teletubbie mit het roze pekske.

Naodet ze mit ein dumpprieskaertje van mer leefs 5,- mit vleegmaatsjappiej Ryanair nao de Slek woore gevlaoge ginge ze dao de däöre aaf. De ganse mörge, middig en nammedig höbbe ze geloupe..mer gein maedje waat het pekske pasdje. En noe? Ze hawwe de Slek, Pey, 't Hènge, Sjèlberg en gans Ech al gehadj? Tot op ein moment Yvonne Janssen van Repke Tepke langsvoor mit häöre BMX mit klèpperke tösse het raat....

De teletubbie mit het greune pèkske deej ein kamikaze-actie en goadje zich väör de BMX van Yvonne, det mit eine gigantische sjlaag ein koprol maakdje en in prikkelstruuk terech koom. Sjit: de ganse kleier van Yvonne woore kapot! D'r zoot dus niks anges op den Yvonne det reserver-teletubbie-roze pèkske aan te doon. En waat woor noe het leuke: het pèkske pasdje wiej GEGAOTE....! Ao jao? Jao!

Nao zo'n 10 menuut ongerhanjeltj te höbbe stömdje Yvonne in mit het väörstèl van de Tubbies. Het zoew waal optraeje oppe Bontje Aovendj vanne Slek. Het optraeje woor ein groat succes en Yvonne haef nao aafloup aan de ganse zaal handjteikeninge oetgedeiltj.

Yvonne stuitj sinds det moment officieel op de reserverlies van de teletubbies. Geruchten gaon det het auch mit moog doon mit de Groate Optoch op de Kalverwei in fibberwarie. Mer det huërtj geer tezienertied waal in dees gezet.

En ze laefdje nog lang en gelökkig. Ènj.

 

 

Yvonne in actie op de Bontje Aovendj vanne Slek!
Repke Tepke 2009 (Bart Golsteijn - thambar@xs4all.nl)