jaor van oetgaaf: 2006

leukheidsfactor:  
 
Zaate Prins maaktj foutje...
 

Pey/Isla Sorna.

Sjokkendj nuuts: Prins Paul I bienao laevendj opgevraete....

Vörige waek om deze tied is Prins Paul I bienao laevendj opgevraete. Wiej kan det zoewtj geer zègge? Laes mer ens wuujer!

Paul, Frank en Bart Golsteijn diej hawwe op eine zondigmiddig niks te doon. De vrouwluuj woore aan het lière en Frank en Paul mooste nog ein sjoan Vastelaovespèkske haole om in rondj te huppelen. Bart dae ging waal mit, want dae wisj duuvels good det zie den nao de sjoppen in ein of anger kroeg zoewe belanje. En det woor natuurlijk auch zoa! De pèkskes woore vlot biejein gesjarreldj en de jonges hawwe ein druëg kael gekreege. Ein gooj reeje om nao de Buuren te gaon.

Nao dao zo'n 4 oer get glazer beer achteräöver te höbbe gehouwdj, ginge die men mer èns richting Pey terök. De trein haw gelökkig gein vertraging dus det koom perfektj oet! Einmaol in Pey aangekomme woor het tied om heives te gaon; al leek det get gemaekelikker den gedach.

Paul dae koos nog neet miea op zien bein staon. Bart en Frank booje aan om hem heives te brenge, mer dao wol ooze Prins van 2005 niks van weite. Hae zoew en moos op eigen krach heives gaon. Naja, nao get gedram höbbe diej 2 Paul mer allein heives laote gaon, neet beseffendj wo det op oet zoew drejje.

Paul dae is toen via eine gekke omwaeg geloupe en haef d'n trein nao Mestreech gepaktj. Dao is d'r oetgestaptj en is, zonger het zelf te beseffen, nao Mestreech-Ake-Airport geloupe wo net de crew van Jurassic Park aan het verzamele woor om nao ein sjoan mer geviërlik eilandj te vleege väör hun nuuj film: Jurrassic Park  - The Raptors attack again.

Sociaal wiej Paul is haef d'r ein gesprek mit ein van diej minse geveurdj. Nao ein half oer te höbbe gezeiverdj is Paul in ein of angere wage in sjlaop gevalle in de kattebak. Det woor neet zo'n probleem op zich. Het probleem woor d'r pas toen bleek det dae wage ongerdeil woor van de nuuj Jurassic Park film. Dae wage höbbe ze later in ein vleegtuug gelaaje det waat nao Isla Sorna, het eilandj van de nuuj film, is gevlaoge...

Paul is toen rondj zon oer of 5 's nachs wakker gewoore. Mer toen woor het al te laat. Het vleegtuug woor al aangekomme op Isla Sorna en hae stong mit ziene wage op ein aafgelaege plaats aan de ziea.

Ooze Prins leet zich neet kènne en pakdje ziene Nokia oet zien boksetès. Hae probeerdje heives te belle....mer: gein bereik... Nouja dach hae, ich kèn neet wuud van heim aaf zeen. Hae keek ens om zich haer en wisj vriewaal zeker det d'r in het Kraanebrook woor. Nörges in Pey of Ech stonge zo'n sjoan groate buim. En waarsjienlijk staon d'r  den aan det vènke; dao haw d'r vreuger nog waal èns op gesjaatsj.

Hae wis zich auch te herinnere det in het Kraanebrook van diej sjoan louproutes oet woore gezatj. Es ich de gael päölkes volg, kom ich zeker thoes oet en hae begoos te loupe. Hae leep 1 oer, 2 oer, 3 oer mer koom mer nörges oet tot hae op ein gegaeve moment get geritsel in de sjtruuk huërdje. Aah mooi, dach d'r, eindelijk minse hiej diej waat mich komme redde! Paul kos op det moment neet weite det wo d'r mit te make haw.

Ziene kater woor vlot weg toen opèns eine groate raptor oet de sjtruuk sprong en väör zien naas begoos te danse. Al vlot volgendje eine twieëdje en eine dördje raptor. Paul wis wo d'r mit te make haw, want Jurassic Park 1 en 2 woore diej waek daoväör nog op Loes tillevisie gewaes.

De raptors pikdje nao hem mer hae sjloog d'r ein paar väör de naas. Mit kreete es 'Noe gank toch weg!' en 'Gank dich eine dikke vange' probeerdje d'r in te speele op diej dinosaurussen. Helaas moogdje det neet bate. De raptors woore vastbeslaote om hem laevendj op te vraete totdet......hae ein mop äöver 2 begiènd vertèldje. De mop woor nog neet aafgeloupe of de raptors vlooge mit de stèrt tösse de bein de struuk weer in tot ze ein paar kilomaeter verder woore gerèndj.

Op det moment huërdje Paul eine reddingshelicopter bäöve zich vleege dae waat hem koom redde. Nao ein korte reis richting Pey haef d'r es ieëste mit os van dees Gazetto della Kwatsj gekaldj en daonao is d'r lekker in bèd gekraope. Eind good, al good.

Paul kiktj de volgendje kiër waal oet wiejväöl d'r drènktj. Mer diej mop van diej begiene haodj d'r toch mer derin....doe wits met noats!

 

Hiej Prins Paul I aug in aug mit de raptors...
Repke Tepke 2009 (Bart Golsteijn - thambar@xs4all.nl)