jaor van oetgaaf: 2006

leukheidsfactor:  
 
John wèntj EK bodybuilding
 

Aafgeloupe zaoterdig haef John Sjoemaekers op ein gemekkelikke maneer het Echter Kampioensjap Bodybuilding op ziene naam gesjreeve. Nao ein jaor van hèl trainen haef d'r de concurrensie te kakke gezatj.

Op het parkeerplaetske van het Buurthoes in ech stong aafgeloupe weekend ein gigantische tent, wo-in de EK gehaoje waerdje. De concurrensie woor den auch neet mis mit minse es Arnold Zwartenak, Rocky I en Rocky III. Toen om 14.11u het startsein gegaeve waerdje woor de stömming den auch compleet in de tent. Nao de rundjes 'casual look', 'badkleier' en 'zoepkleier' woor het eigenlijk al ein beslisdje zaak. De topfavoriet John Sjoemaekers zoew tot Echter Kampioen waere gekruëndj. Väöral zien 'casual' outfit moogdje d'r zeen en hiej woor de jury den auch super enthousiast äöver.

Naodet John mit 32 puntje haw gewonne (taege respectievelijk 11,10 en 8 väör de rest) koos hae zien vreugdje den auch neet op. Nao de priesoetreiking om 20.00u is John direct heives gegange en haef d'r zich ein krat Bavaria achteräöver gehouwe om het te viere. 'Ach, diej kilo's train ich d'r waal weer vanaaf', sprook John lakoniek achteraaf.

Names dees gezet wille weer John van herte filliciteren en succes toewènse väör de Slekker Kampioensjappe Bodybuilding, diej achter 2 waeke gehaoje waere biej de parkeerplaats van het Slekkerhoes.

John is nao zien optraeje benaderdj door het maondjblaad 'Bodybuilding Magazine' det ein groat interview mit hem wol haoje. Hiejop haef John toegestömdj en vanaaf donderdig ligtj dit blaad in de baetere winkels. Ooze Echter Kampioen pronktj op de väörpagina. Via geruchten höbbe weer vernomme det John samen mit zien vriendin Yvonne, det auch de waeg van professioneel bodybuilding is ingeslagen, volgendj jaor mitduitj aan de Staerswaerter Kampioensjappe väör koppeltjes-bodybuilding. Taege dae tied huëtj geer hiej mië van!

 

Hiej John in ein 'casual' outfit op de väörpagina van 'Bodybuilding Magazine'
Repke Tepke 2009 (Bart Golsteijn - thambar@xs4all.nl)