jaor van oetgaaf: 2007

leukheidsfactor:  
 
Manon en häör koe 'Vötje' doon mit väör de prieze
 

MYSUBYTTSETER, NOORWEGEN

Kommendj weekend is het den eindelijk zoa wuud; de Europese Kampioensjappe Koe-triatlon vanoet triatlon-Mekka Mysubyttseter in Noorwegen. En oos nationaal trots Manon Rameckers oet Pey duitj hie same mit häör koe 'Vötje' aan mit.

Manon koestertj al sinds het ein klein maedje is eine groate druim. En dae is om same mit ein topkoe mit te doon aan de triatlon väör kuuj. Toen het väörig jaor bie Graatje ein lekker frikkedel mit majjenais koch vonj het per toeval in de frikkedel ein extreem Wild-card väör de Europese Kampioensjappe Koe-triatlon in Mysubyttseter. Waat ein toeval! 't Haef toen dirèk kontak opgenomme mit de vertegenwoordiger van de triatlon in Mysubyttseter om zich in te sjrieve mit de Wild-card. Via DifficultJet haef het toen ein vleegticket geboektj en väör 10,- euro woor 't de man (vrouw, red.). D'r woor allein ein probleem: Manon haw nog gein koe!

Mit ein aeve extreem campagne haef 't eedere boer en boerin benaderdj in gans Nederlandj. En op dees campagne kreeg het slechts ein reaksie; boer Tjabbe Tjèboer oet Tsjokkum (Dokkum in 't Nederlands). Dae haw nog ein reservekoe op stal staon, waat Manon gratis en väör niks mit koos numme. Het betrof zich hie ein koe van het merk 'Botter-kieës-en-eier II' mit eine speciale oetlaot, aldus de besjrieving.

Op eine lullige zaoterdigmörge is Manon den auch nao Tsjokkum aafgereisj om de koe op te haole. Boer Tjabbe Tjèboer woor allang bliej det Manon de koe mit de naam 'Vötje' op koom haole. Woorom det woor toen nog neet dudelijk. Waal woor 't ein perfek moment om de koe oet te probere mit het oug op de naderendje Europese Kampioensjappe in Mysubyttseter. Manon is den auch al 'triatlonnentj' terökgekomme nao Pey. Väör de minse die neet weite waat eine triatlon is: 't is ein multisport - 180 kilomaeter fietse, 3,8 kilomaeter zwömme en 42,195 kilomater rènne. En doot det mer ein same mit ein koe!

Het fietse woor het ieëste obstakel; het woor ein gesol om Vötje op dae fiets te kriege en es det einmaol woor gelökt, moos Manon vliegensvlug op de nak van Vötje klömme. Dirèk waerdje auch dudelijk det de speciale oetlaot van Vötje ech speciaal woor. Om de menuut leet Vötje namelijk eine onnoemelikke sjeet, wo Manon de oare van flapperdje. Toen woor auch väör Manon dudelijk woorom Boer Tjabbe Tjèboer Vötje zoa gaer weg haw gedaon.

Toen det hèls karwei van ein fietsen aafgeslaote woor, woor 't zwömgedeilte aan de bäört. En det ging ein stök gemaekelijker. Vötje sprong al oet zichzelf 't water in, Manon sprong daonao op de kraomenak en door die sjeete van Vötje ginge die twieë wie eine speedboat väöroet! Het zwömme woor den auch gaw gedaon en daonao zatte ze het beide op eine rènne. Auch det ging het sportduo redelijk aaf al woor Vötje Manon waal ein paar kieër op de dikke teen gaon staon. Nao 25 oer, 27 menuut en ein handj vol seconde woore Vötje en Manon gearriveerdj in Pey.


Dees waek zeen Manon en Vötje aafgereisj nao Mysubyttseter mit 't vleegtuug en op dit moment zeen ze in volle väörbereijing väör 't Europees Kampioensjap van aankommendj weekend. Names dees gezet wille weer Manon en Vötje allebei hieël väöl sukses toewènse en haopelijk pakke ze eine sjoane pries! Zit hem op! De triatlon is zondig live te volge op Tillevise-111.

Väör noe, terök nao de studio.

 

Hie Manon same mit Vötje in de stal van boer Tjèboer in Tsjokkum
Repke Tepke 2009 (Bart Golsteijn - thambar@xs4all.nl)