jaor van oetgaaf: 2007

leukheidsfactor:  
 
Roy vanne Theuler president van de Slek
 

De Slek is in rep en roer. Minse loupe äöver straot es hoonder zonger kop, de voelnis wurdj neet mie opgehaoldj en de roodtstraot stuitj van väör tot achter vol mit auto’s. Groate dikke auto’s van belangrieke waereldleiders.
De veroorzaker van al dit spektakel is nemes minder es Roy vanne Theuler. President Roy vanne Theuler waal te verstaon, want vanne Theuler is sinds gister officieel gekroontj tot president van de Slek. Jao geer leusj het good, van de Slek. Sinds gister is de Slek namelijk ein zelfstènjig landj, mit ein eigen economie, ministerraod en ein eigen grondjwèt.

Vanne Theuler woor op het idee gekomme toen de voelniswagen väör de zoväölste kier op de waeg stong toen hae nao zien vriendin Myrthe wol vaare in ziene wage. Hae dach bie zien eigen “woorom mot toch eeder waek dae stomme voelnis opgehaoldj waere. Het stinktj neet allein, mer d’r kan auch geinen hondj mie door op de waeg. Woorom kan de voelnis neet gewuuën allein nao Nuujjaor en nao de Vastalaovendj opgehaoldj waere. Want den is de voelnis op ziene top”. Op det moment veel hem in det hae mie mach zoew motte höbbe om det door te kènne zitte. Mach dae eine president haef.

Roy haef zich den auch verkeesbaar gestèldj op de Slek. Zien campagne is gelèdj door de charmante Slekker maedjes Ellen en Laurie. Samen höbbe zie väöl gèldj opgehaoldj en dao haef vanne Theuler de Slek van gekoch. De minse in ’t dorp woore laajens enthousiast, want eederein ergerdje zich äöver dae stomme voelnis. Roy is den auch unaniem verkaoze tot president van de Slek. Ellen is daonao door hem beneumdj tot Minister van Boeteslekkerzake en Laurie es Minister van Financiën. De äöverige poster zeen nog neet beklèdj, mer geruchten doon de runj det Boudie de ministerpost van Landjboew geitj bekleie.

Op dit moment wurdj het parlementsgeboes geboewdj op de Raod en Roy krig auch ein eigen töreke. Op de Rutsekovenstraot is eine gigantische aafvalcontainer geplaatsj wo eedere inwoner van de Slek zien rotzooi in kan goaje. Uiteraard wurdj deze container allein nao Nuujjaor en Vastelaovendj gelaegdj. De Slekkerstraot wurdj in de loup van dit jaor op de sjöp genomme, want dit wurdj de A1111 autosnelwaeg. Dae geitj richting Pey en Ech.

Uiteraard zeen de ontwikkelingen van de Slek nog in volle gang en mie kènne weer uch op dit moment nog neet vertèlle. Blieftj dees gezet laeze om volledig op de huuëgte te blieve van de leste ontwikkelingen van Sleklandj.

 

Hie Roy in zien slaopkamer, die op dit moment nog ingerichtj is es zien wèrkplek
Repke Tepke 2009 (Bart Golsteijn - thambar@xs4all.nl)