jaor van oetgaaf: 2010

leukheidsfactor:  
 
Vanne Meuwis waereldkampioen formule 1
 

De ieëste Nederlandse waereldkampioen Formule 1 is ein feit. Het is neet Jos 'grèndjbak' Verstappen, neet Chrisian (Kw)albers met nemes minder es Royke vanne Meuwis!

Roy oet Zöstere (bienao Ech) is al sinds jaor en daag eine fervente formule 1 leefhöbber. Toen hae nog ein klein jungske woor, stong hae zelfs midden in de nach op väör ein kwalificasie en natuurlijk de race zelf. Auch speeldje hae daag en nach het spel GrandPrix 2 op de Pentium 60 van de pap van Roy. Omdet 't toch altied raegentj in Zöstere, kreeg hae daomit good de daag om.

Naeve zien baan in Eindhoven en ziene hobby es sjlaagwèrker bie Repke Tepke haef hae in de vriej uurkes gereesj op de bönnewaeg van Zöstere. Ein paar jaor geleeje haef hae namelijk eine aoje Benetton gekoch oet 1994 van Sjoemacher. Sjoemacher is namelijk de broor van de broor van de oom van de kènnis van de tante van de zwaoger van de fan van de zöster van Roy. Vanne Meuwis haef mit dae aoje Benetton flink getesj en mit succes! Hae is namelijk in 2005 gespotj door eine F1-spotter dae 't waal zoog zitte in oze Roy. Roy kreeg daonao ein racecontract aangebaoje bie ein slech F1 team.

Mit väöl inzet, mer auch väöl voel en vies aksies op de baan haef hae zich oeteindelijk in de kieker gereeje bie het team van Ferrari. Dao dènke ze trouwens det hae eine Pruus is (det höbbe ze aafgelèdj oet zien vettige riestiel). Mer good... Roy is dit jaor dus waereldkampioen Formule 1 gewore. Mit 11 äöverwènninge op onger angere Monza, Spa en de Hungaroring haef hae de meiste puntje biejein gesprokkeltj. De concurrensie haef hae wuud achter zich gelaote, wo-onger biejväörbeeldj Massa, Alonso en Vettel. En det zeen neet de minse jonges. Auch neet in de kroeg nao de raceweekenden.

Ondanks det Roy noe waereldkampioen is, is hae neet ech eine publieklieveling. Det kömtj door zien riejstiel. Het woor aafgeloupe weekend den auch neet de ieëste kieër det hae eine 'concukliera' - zoaes hae zelf zaetj - van de baan voor. 'Gein pardon väör nemes', zaet Roy zelf altied. Zoa deej ich 't op de compjoeter mit GrandPrix 2 auch altied en zoa zal ich det altied blieve doon. 

Es redaksie van dees gezet wènse weer Roy in eeder geval väöl succes toe väör volgend jaor. Geer kèntj trouwens dit weekend de herhaling van de race kieke. Es geer speciaal zeuktj nao Roy in ziene wage, let den op eine coureur mit ein Vastelaovesmöts op. Roy haef namelijk geine helm op, mer ein aoj möts!

 

Hiej Roy nao t wenne van het kampioensjap in Interlagos
Repke Tepke 2009 (Bart Golsteijn - thambar@xs4all.nl)