Tant Triene höbbe weer liëre kènne tiejens de Echter Kirmes in oktoaber 2006. Zie woor ein geval apaart en aangezeen zie in hunne vriejetied nog get sjreef hie en dao, koos zie mesjiens ein aanvöllig zeen op dees website. D'r is begin 2007 den auch mit häör aafgespraoke det zie get kollums zoew sjrieve, väör op dees sjoan site.

Zoa gezag, zoa gedaon. Tant Triene haef ein 7-tal kollums geproduceerdj en dees zeen allemaol nog te laeze. Kiek mer ens hiejonger en aansjouw zelf waat ein gebraggel die op papier kan zitte. Nao 3 jaor te zeen ongerdaoke haef zie in 2010 de draod weeropgepakt. Mit ein nuuj serie kollums waal te verstaon die geer auch hiejonger kèntj bewonjere!

 
 
 
Jaorgank 2014: Prinsenkollum |
 
Jaorgank 2010: Kollum 1 | Kollum 2 | Kollum 3 | Kollum 4 | Kollum 5 | Kollum 6 |
 
Jaorgank 2007: Kollum 1 | Kollum 2 | Kollum 3 | Kollum 4 | Kollum 5 | Kollum 6 | Kollum 7 |
 
't Griene van Triene
 

Bart G., dae bédfoemel van Ellen, haef mich gevraogdj óm noe in de vastelaovestied weer get stichtelike wäörd, behertenswaardige äöverpeinzinge en angere sjaele zeiver inein te drejje väör de wepsait van RepkeTepke. Ofsjoan ich in mien kollums van 2007 al alle ónzin höb oetgekraompdj dae eine gesjieësdje mins kéntj verzinne, wil ich toch ein poging wage óm dao nach ein sjöpke baovenop te doon.

Ich zoog det de wepsait hieëlemaol opgekallefaterdj is. Zuutj d’r waal aardig oet väör ein gezelsjap wovan ’t IQ geliek is aan de gemiddeldje sjoonmaot vanne leje. Väöral ’t Gastebook is razendj interessant. Waat se dao neet allemaol väör wetenswaardighede op kéns trok vénje. Ein väörbeeldje. Frank: “Ich höb de hieële daag väör pampus oppe bank mótte ligke.” Laurie: “Had se weer teväöl gezaope denne?” Frank: “Nae, ze höbbe ingebraoke bie ós en mien béd geklauwdj.” Of dit beväörbeeldj. Ellen: “Sjattepoemelke, zólle weer get gaon drénke op ’t terras bie de Stoba? Bart: “Nae honneponneke, dao höb ich noe geine tied väör. De hóndj is luips en mót gedéktj waere en det doon ich lever zelf.” En zoa geit det bladzijde achterein door! ’t Is inderdaad belangriek det de hieël Ech-Zösterse gemeinsjap dit saort waereldjsjokkendje nuutsfeite te laeze krigtj. Zoe mich get anges zeen es det gewazel äöver die Sinterklunze in ’t ambtelik rösoord ane Nuje Mert!
 
Ich loos oppe wepsait aug det geer op 5 fibberwarie weer ein Vastelaoveskonzaer gaontj gaeve en eine nuje verenigingsprins of -prinses gaontj oetrope. Zoa wie eder jaor zal de Prinsekommissie waal weer eine verkieërdje kommeidemaeker höbbe oetgezoch. Dao bösse den sjoan klaor mit. ’t Is nag neet te laat en geer kéntj nag trok kómme van de ingesjlage, heilloze waeg. Gebroektj eur verstandj en maak mich dit jaor Prinses. Dao zóltj geer geine spiet van kriege. Ervaring höb ich zat. Zoaes geer wétj bön ich vreuger Prinses gewaes in Aosterberg (kiek mer ‘ns bie kollum 3 oet 2007). In 2008 bön ich Prinses gewaes in Bejaardehoes De Eghte in Ech en in 2009 in Zorgcentrum Vastrada in Zöstere. Bie De Eghte hawwe ze mich drek nao de vastealovendj van 2008 d’roetgeflikkerdj ómdet ich väör de joeks de inkontienensieluiers inne fik haw gestaoke en driekwart vanne bewoners toen twieë waeke lank (toen kome pas nuje) in naat en smerig óngergood haef mótte róndjsjoaje. Mer geer zeentj ‘t: ich kén baoge op ein geweldige ervaring es Prinses. Hang noe neet de ónnueezele halsbandj oet en roop mich op 5 fibberwari gewueen es nuuj Prinses nao väöre. Det haef aug nag es väördeil det alle bewoners van De Eghte en Vastrada (allemaol gestaoke in eine nuje inkontienensieluier) den nao de Stoba kómme zoadet geer eindelik ‘ns get publiek höbtj bie det Vastelaoveskonzaer van uch. Ich höb aug al eine spreuk bedachtj väör es ich dalik Prinses bön bie uch: 
“Vastelaovendj mit Tant Triene, 
weurdj zelfs gevierdj door de begiene.”
 
Eur tant Triene
 
Repke Tepke 2009 (Bart Golsteijn - thambar@xs4all.nl)