Tant Triene höbbe weer liëre kènne tiejens de Echter Kirmes in oktoaber 2006. Zie woor ein geval apaart en aangezeen zie in hunne vriejetied nog get sjreef hie en dao, koos zie mesjiens ein aanvöllig zeen op dees website. D'r is begin 2007 den auch mit häör aafgespraoke det zie get kollums zoew sjrieve, väör op dees sjoan site.

Zoa gezag, zoa gedaon. Tant Triene haef ein 7-tal kollums geproduceerdj en dees zeen allemaol nog te laeze. Kiek mer ens hiejonger en aansjouw zelf waat ein gebraggel die op papier kan zitte. Nao 3 jaor te zeen ongerdaoke haef zie in 2010 de draod weeropgepakt. Mit ein nuuj serie kollums waal te verstaon die geer auch hiejonger kèntj bewonjere!

 
 
 
Jaorgank 2014: Prinsenkollum |
 
Jaorgank 2010: Kollum 1 | Kollum 2 | Kollum 3 | Kollum 4 | Kollum 5 | Kollum 6 |
 
Jaorgank 2007: Kollum 1 | Kollum 2 | Kollum 3 | Kollum 4 | Kollum 5 | Kollum 6 | Kollum 7 |
 
't Griene van Triene
 

 Kiek, det ich dit jaor alweer gein Prinses bie RepkeTepke waer, dao höb ich mich inmiddels mer bie neergelag. Ich höb jao ummers aug al ein sjoan alternatief bie Zate Hermenie BoemPaafPaaf in Urk. Mer is ’t neet mäögelik det ich bie det Vastelaoveskonzaer van uch dao inne Stoba op vriedig 5 fibberwari ein optraeje in ’t väörprogramma verzörg? Of gaontj geer dao allein van die feepfanfares de buun opjage? Ich num aan det De Jónges vanne Zank in elk geval aug waal hun dénk moge doon ómdet geer det pleebekkoar muzikaal begeleidj höbtj bie de opname van hun CD. Mer verder allein mer fepe? Mótj geer neet doon! Geer mótj variasie in ’t programma brénge. En esse variasie zaes, den zaes se Tant Triene. 

 
Ich höb ein aantal versjillendje ekts die ich kén opveure. Óm te beginne kén ich de plenk opgaon es mien zöster Mechel, geer wétj nag waal van de väörige serie kollums, die karnaalje oet Aosterberg. Geer mótj Huub vanne Stoba den waal effe eine staolkabel door de ganse zaal laote spanne. Dao gaon ich den aanhange en mit ein rotvaart vleeg ich den op eine baesem door de zaal óm aan ’t énj van dae kabel mit mien klitse taege de moer aan te pleure. Ederein verwachtj den ein groate roai vlek op die moer en dao zitj noe net de grap vanne ekt. Mien zöster Mechel haef blaw blood! Verder höb ich aug nag eine ekt ingestudeerdj es michzelf. Dae haef mieë ein filosofies karakter. Ich laes den ein aantal wies spreuke väör die ich zelf bedach höb, zoaes “Geluif se in leefdje op ’t ieëste gezich of mót ich nag eine kieër langsloupe?” Of “Ich kal neet te vlot, doe loesters te langzaam!” En deze “Es wérke good woor hawwe de rieke ’t neet aan de erme äövergelaote!” Waat dach geer van deze “Ich bön nag stieëds vriegezel. Mien sjoanaojers kóste gein kénjer kriege.” Of deze “Zoalang miene baas dénktj det ich väöl verdeen doon ich net esof ich hel wérk.” Liektj uch det get? Zoe mich get anges zeen es de hieële aovendj van die feeporkeste! Bel snel went ich höb aug nag anger aanbejinge!
 
Ich zoog trouwes det geer neet op ’t PlatsSpektakel staontj dit jaor. Zeker weer vergaete uch opper tied aan te melje. Draodaezele! Mer vergaet in eder geval neet óm op 3 mieërt op Lies 11 te stumme. Lies 11: “Trien es Kwien!” 
 
Repke Tepke 2009 (Bart Golsteijn - thambar@xs4all.nl)