Tant Triene höbbe weer liëre kènne tiejens de Echter Kirmes in oktoaber 2006. Zie woor ein geval apaart en aangezeen zie in hunne vriejetied nog get sjreef hie en dao, koos zie mesjiens ein aanvöllig zeen op dees website. D'r is begin 2007 den auch mit häör aafgespraoke det zie get kollums zoew sjrieve, väör op dees sjoan site.

Zoa gezag, zoa gedaon. Tant Triene haef ein 7-tal kollums geproduceerdj en dees zeen allemaol nog te laeze. Kiek mer ens hiejonger en aansjouw zelf waat ein gebraggel die op papier kan zitte. Nao 3 jaor te zeen ongerdaoke haef zie in 2010 de draod weeropgepakt. Mit ein nuuj serie kollums waal te verstaon die geer auch hiejonger kèntj bewonjere!

 
 
 
Jaorgank 2014: Prinsenkollum |
 
Jaorgank 2010: Kollum 1 | Kollum 2 | Kollum 3 | Kollum 4 | Kollum 5 | Kollum 6 |
 
Jaorgank 2007: Kollum 1 | Kollum 2 | Kollum 3 | Kollum 4 | Kollum 5 | Kollum 6 | Kollum 7 |
 
't Griene van Triene
 

 Ich höb slech nuuts väör uch: die kommeidemaekers in ’t gemeindjehoes in Ech höbbe mien lies väör de gemeindjeraodsverkezinge aafgekäördj. Dao stónge 10 luuj op die allang doad zeen en det sjient neet te moge. Wis ich väöl! Dao gaon lies 11 en “Trien es Kwien”! Ein groat sjandaal natuurlik mer jaomer genóg niks mieë aan te doon. Door ’t wegvalle van mien lies weurdj ’t väör uch noe behelpe (mer det mótj geer toch al eder jaor mit dae verkieërdje Prins/Prinses). Geer zóltj ’t noe mótte doon mit figure wie dae fependje Paultje dae bie pNES (van Teun) oppe lies is gekraope. Óm te väörkómme det geer op 3 mieërt hieëlemaol de mis ingaontj hiejónger get aanvöllendje informasie äöver det gehóddel det se gemeindjeraodsverkezinge numme.

 
Op 3 mieërt weurdj vanne inwoners van Ech-Zöstere verwachtj det ze nao de stumbös gaon óm eine nuje gemeindjeraod te keze. ’t Leek mich waal ein strak plan óm eine deskundige ‘ns väöroet te laote blikke oppe oetslaag en waat d’r daonao allemaol geit gebäöre. En waem kén se dao den baeter väör vraoge es awd-Pejjenieër Lei van Thoar, 33 jaor raodslid gewaes in de aoj gemeindje Ech. Es weer Lei mótte gluive geit op en nao 3 mieërt ’t volgendje gebäöre. 
 
Kitty Schaftenaar, de besjermvrouw vanne Aester Sjaelen Uul, kömptj väör de VVD inne raod en ’t ieëste waat zie duitj is börgemeister Dieudonné Akkermans de hort opjage en häöre mins op de vriegekómme zetel neerpaote. Awd-VVD-er Peter Ruijten (noe van pNES) redj ’t neet en kömptj dus neet mieë trök inne raod mer weurdj waal beneumptj es beheerder van ’t nuuj multifunksjoneel zalekompleks vanne hermenie van Ech wo d’r toch al väörzitter van woor. Ómdet de meiste luuj in Ech-Zöstere neet mieë in Sinterklaos gluive valle Jo Verheesen (Samenwerking) en Peter Pustjens (CDA) boete de boat. Zie gaon noe eder jaor in december bie de Vrouwebóndj van Aosterberg väör Zwarte Piet spele. Algemeen Belang kömptj hieëlemaol neet mieë trök inne raod ómdet die slummerikke hun lies hawwe ingedeendj bie de gemeindje Zitterd-Gelaen in plaats van in Ech-Zöstere. In Zitterd-Gelaen höbbe ze trouwes waal eine zetel behaoldj mer dae kénne ze neet invölle ómdet nemes van die lies in die gemeindje woontj. Ómdet de PvdA-stummers ’t hieëlemaol gehadj höbbe mit die äöverluipers oet de aafgeloupe zittingsperiode (de PvdA-raodsleje Elly Janssen en Joep Severins stapdje in november 2009 äöver nao Democraten Echt-Susteren) blieve die massaal toes wodoor zoawaal de PvdA es aug DES oet de raod waere geflikkerdj. Oeteindelik geit de oetslaag d’r op 3 mieërt es volgtj oet zeen: CDA 3 zetels, Samenwerking 3 zetels, de VVD 1 zetel en GroenLinks 16 zetels. Aangezeen GroenLinks van meining is det ’t politieke klimaat in Ech-Zöstere neet dusdanig revoluutsjonaer is det d’r daadwerkelike verangeringe kénne waere doorgeveurdj keze die d’r väör óm in de oppositie te gaon zitte. De VVD-vertaegewoordigster kós ’t gemeindjehoes neet vénje en véltj aug boete de boat. Samenwerking en ’t CDA vorme dus de nuuj coalitie en in ein ekstra raodsvergadering waere op 10 mieërt de zés wéthaojers gekoze: Jan Feller, Riny Geelen en Jo van Neer väör Samenwerking en Naad Schoenmakers, René Scheres en Mia Maessen väör ’t CDA. 
 
Ómdet Lei van Thoar ’t mit deze gang van zake neet éns is en van meining is det dees wéthaojers neet douge ómdet ze leje vanne femilie Stassen de gojedaag zegke deentj dae bie de Raad van State ein bezwaorsjrif in. Die instansie geuft hem op 30 mieërt geliek en de coalitie treutj aaf. Börgemesiter Schaftenaar sjrift väör 23 april nuuj verkezinge oet en die kénne eine opzienbarendje oetslaag: Samenwerking 1 zetel, CDA 1 zetel, VVD 1 zetel, PvdA 1 zetel, pNES 1 zetel, GroenLinks 1 zetel, DES 1 zetel en Lies Van Thoor 16 zetels. Algemeen Belang haw noe häör lies in Remunj ingedeendj en is dus weer aafgevalle. De Lies Van Thoor vormtj allein de coalitie en levertj zés wethaojers (allemaol naeve en achternichte van Lei). Lei van Thoar sjaftj de kommissie- en de raodsvergaderinge aaf en jeugtj de femilie Stassen de gemeindje oet. Premier Balkenende stuurtj ’t leger nao Ech-Zöstere óm de boel inne gate te haoje.
 
Dit haw allemaol verkómme kénne waere es se mich gewueen hawwe laote mitdoon aan die verkezinge. Noe haef nemes get: Ech-Zöstere haef eine road wo se geine kantj mit oet kéns en RepkeTepke haef eine verkieërdje Prins/Prinses. Dao zeen weer den vét mit!     
 
Repke Tepke 2009 (Bart Golsteijn - thambar@xs4all.nl)