Tant Triene höbbe weer liëre kènne tiejens de Echter Kirmes in oktoaber 2006. Zie woor ein geval apaart en aangezeen zie in hunne vriejetied nog get sjreef hie en dao, koos zie mesjiens ein aanvöllig zeen op dees website. D'r is begin 2007 den auch mit häör aafgespraoke det zie get kollums zoew sjrieve, väör op dees sjoan site.

Zoa gezag, zoa gedaon. Tant Triene haef ein 7-tal kollums geproduceerdj en dees zeen allemaol nog te laeze. Kiek mer ens hiejonger en aansjouw zelf waat ein gebraggel die op papier kan zitte. Nao 3 jaor te zeen ongerdaoke haef zie in 2010 de draod weeropgepakt. Mit ein nuuj serie kollums waal te verstaon die geer auch hiejonger kèntj bewonjere!

 
 
 
Jaorgank 2014: Prinsenkollum |
 
Jaorgank 2010: Kollum 1 | Kollum 2 | Kollum 3 | Kollum 4 | Kollum 5 | Kollum 6 |
 
Jaorgank 2007: Kollum 1 | Kollum 2 | Kollum 3 | Kollum 4 | Kollum 5 | Kollum 6 | Kollum 7 |
 
't Griene van Triene
 

Ze höbbe mich gevraogdj óm tót ane vastelaovendj eder waek eine kollum te sjrieve väör de wepsait vanne Limburgse Kampioen Zate Hermeniekes 2006. Miljaar, ein lestige vraog esse neet wéts waat eine kollum is! Eine paersnaef van mich, dae gelökkig neet konstant oppe leger sjoal is blieve zitte mer aaf en toe draaf is gekómme en nao bönne is gegange es de meister of de juffrouw les gove, haef mich oetgelag waat eine kollum is en toen höb ich mer ‘jao’ gezag.

Ich haw ’t in miene ieëste kollum eigelik wille gaon höbbe äöver dae naam van det gedoons van uch, went dao kloptj gein klaote van. Mer d’r is momenteel get belangriekers aan de handj en det reuptj óm väörang: ’t 5e PlatsSpektakel op zaoterdig 17 fibberwari. Oet gooj bronne höb ich vernómme det d’r dit jaor gein plaats zoe zeen oppe Plats väör de Limburgse Kampioen Zate Hermeniekes 2006!! Zeen die spektakelmaekers noe hieëlemaol vanne krokodille besnuffeldj? Kénne ze eindelik ‘ns get van nivo kriege, zegke ze det dao geine tied väör is in ‘t programma! Van prioriteite stélle haef det soppegreun vanne organizasie van det gehóddel natuurlik nag noaits gehuuërdj! Óm nag mer te zwiege äöver ein fraksie van deskundigheid. Nae, sjeep die doezendje luuj die zich dao väör ’t viefdje jaor op riej ane straotstein laote vasvreze mer weer aaf mit det gebraggel van anger jaore! Doa truk se vol zale mit!! ’t Is tog auch neet te gluive! Höb se eindelik weer ‘ns eine Limburgse kampioen bönne dien gemeintegrenze, is d’r gein plaats mieë in ’t programma!

Vanoet ein anger funksie (väörzitster vanne kniensfókvereniging “De eeuwig durende vermenigvuldiging”) höb ich die luppetrulle vanne organizasie inmiddels ein keihél ultimatum (miene paersnaef haef mich oetgelag waat det is) gestéldj. Väör 1 fibberwari mót d’r ein sjriftellike (allein gesjreve op leeg raos geparfumeerdj papier weurdj geaksepteerdj!!) oetnuuëdiging bie de sikkretaris vanne Limburgse kampioen oppe däörmat ligke went anges brandj de lamp! Den gaon ze zich dao op die Plats nag kratse wo ze geine jäök höbbe! Den zeen die nag lang neet aan’t hóddele dao! Ich kén emes dae weer emes kéntj dae Lei van Toar de gojendaag moog zegke. Sinds dae neet mieë inne gemeindjeraod zitj haef dae tied zat óm lénks en rechs get evenementevergunninge taege te haoje. Es ’t den zoa mót, den mót ’t mer zoa!

Mog dees radikaal aksie niks oplevere, den zoetj geer es hermenieke nag kénne äöverwaege óm op zaoterdig 17 fibbberwari oet protes taege det geklungel van die lómmelegezichte van ’t PlatsSpektakel op ’t Ursulinenplein te gaon spele. Doa is den waal geine hóndj, mer dao stuitj taegenäöver det geer ’t hieël plein väör uch allein höbtj. Det is auch weer ‘ns get anges!

Ich haop oet de gróndj van mien steine hert det ’t allemaol neet zoawuut hoof te kómme en det die hampelemen van ’t PlatsSpektakel oppertied hun verstandj trökvénje. Es ’t ech neet anges geit, wil ich zelfs waal helpe zeuke ofsjoan ich mich realizeer wie lestig det det is. ’t Zal waal erg klein en moeielik te vénje zeen, det verstandj!

 
Repke Tepke 2009 (Bart Golsteijn - thambar@xs4all.nl)