Tant Triene höbbe weer liëre kènne tiejens de Echter Kirmes in oktoaber 2006. Zie woor ein geval apaart en aangezeen zie in hunne vriejetied nog get sjreef hie en dao, koos zie mesjiens ein aanvöllig zeen op dees website. D'r is begin 2007 den auch mit häör aafgespraoke det zie get kollums zoew sjrieve, väör op dees sjoan site.

Zoa gezag, zoa gedaon. Tant Triene haef ein 7-tal kollums geproduceerdj en dees zeen allemaol nog te laeze. Kiek mer ens hiejonger en aansjouw zelf waat ein gebraggel die op papier kan zitte. Nao 3 jaor te zeen ongerdaoke haef zie in 2010 de draod weeropgepakt. Mit ein nuuj serie kollums waal te verstaon die geer auch hiejonger kèntj bewonjere!

 
 
 
Jaorgank 2014: Prinsenkollum |
 
Jaorgank 2010: Kollum 1 | Kollum 2 | Kollum 3 | Kollum 4 | Kollum 5 | Kollum 6 |
 
Jaorgank 2007: Kollum 1 | Kollum 2 | Kollum 3 | Kollum 4 | Kollum 5 | Kollum 6 | Kollum 7 |
 
't Griene van Triene
 

Ich wool ‘t ‘ns effekes mit uch zökkezuimers gaon höbbe äöver dae naam van det klupke van uch: RepkeTepke. Waem verzintj zoaget? Degene waat dae naam bedach haef, dae haef oppe daag det de hersene waerdje oetgedeildj ofwaal hieëlemaol achteraan denwaal inne verkieërdje riej gestange en haef van ’t verzinne van name net zoaväöl verstandj es eine olifant van aspergesstaeke. Ich num aan det mit Repke “vlot”, “snel” of “vlug” bedoeldj weurdj. En mit Tepke zal waal “tap”, “buffet” of “toog” bedoeldj waere. En es eine Hollenjer noe vreugtj waat RepkeTepke beteikendj? Waat denne? Den höb geer ein vét probleem. SnelkeTapke! VlotkeBuffetke! VlugkeToogke! Det klinktj toch väör geine maeter! En es eine Ingelsman, eine Pruus of eine Fransoos nao de beteikenis vreugtj? Doa zótj g’r waal neet ins äöver nao durve te dénke! Ich mót d’r eigelik neet an dénke, mer ’t zoe natuurlik auch nag kénne det det “Repke” ein verwiezing is nao “rappen”. Det zoe den pas ech ein groat sjandaal zeen. Zate Hermeniekes-meziek haef niks, mer den auch hieëlemaol niks oet te staon mit det dóm gebraggel van die ADHD-pasjente die ’t primair meziek- en taalóngerwies oppe leger sjoal höbbe misgeloupe. Es d’r al zoanuuëdig gereptj mót waere, den duis se det in eder geval neet op of bie de tap mer örges in eine kelder of in ein aafgelaege boeresjuur wo nemes dich kéntj huuëre. Ofsjoan geer uch det gedoons mit dae naam zelf oppe hals höbtj gehaoldj en geer ’t uch dus eigelik auch mer zelf mótj opsoppe, wil ich toch probere óm ein oplossing te vénje väör dit waereldjprobleem. ’t Zoe ummers jaomer zeen es geer de res van eur laeve wujer mótj mit eine naam dae sluitj wie ein tang op ein verke.

Béste oplossing zoe nach zeen óm uch Zate Hermenieke “Loop snel naar het horeca-etablissementbuffet toe” te neume. Hoof g’r neet te vertale väör die Hollenjers! Mer ómdet ich betwiefel of alle leje van eur klup det kénne laeze, sjrieve en ónthaoje véltj dit aaf. Zate Hermenie “Met gezwinde spoed vloeibare versnaperingen gaan halen bij de toog” zoe auch kénne. Mer det is zoa lank det det waarsjienlik neet op ein t-shirt pastj en det haef weer es naodeil det nemes uch den nag herkéntj es zate hermenie en uch misjien geit aanzeen väör ’t kérkbestuur van Pej. Sjutj auch neet ech op! Zate Hermenie “Begeef u naar den tap en doe dat alstublieft een beetje rap” zoe auch ein mögelikheid kénne zeen mer de luuj van taegewoordig weite neet mieë waat ‘alstublieft’ beteikentj. Véltj dus auch aaf!

Misjien det geer ‘t ’t béste äöver eine hieël angere boeg kéntj goaje: Zate Hermenie De Blawwe Knoup. Zeentj geer van det geloup nao dae tap aaf en kéntj geer bie gelaegenheid auch nag optraeje oppe Veluwe. Went es blaw knuip örges op henj waere gedrage den is ’t dao waal!

 
Repke Tepke 2009 (Bart Golsteijn - thambar@xs4all.nl)