Tant Triene höbbe weer liëre kènne tiejens de Echter Kirmes in oktoaber 2006. Zie woor ein geval apaart en aangezeen zie in hunne vriejetied nog get sjreef hie en dao, koos zie mesjiens ein aanvöllig zeen op dees website. D'r is begin 2007 den auch mit häör aafgespraoke det zie get kollums zoew sjrieve, väör op dees sjoan site.

Zoa gezag, zoa gedaon. Tant Triene haef ein 7-tal kollums geproduceerdj en dees zeen allemaol nog te laeze. Kiek mer ens hiejonger en aansjouw zelf waat ein gebraggel die op papier kan zitte. Nao 3 jaor te zeen ongerdaoke haef zie in 2010 de draod weeropgepakt. Mit ein nuuj serie kollums waal te verstaon die geer auch hiejonger kèntj bewonjere!

 
 
 
Jaorgank 2014: Prinsenkollum |
 
Jaorgank 2010: Kollum 1 | Kollum 2 | Kollum 3 | Kollum 4 | Kollum 5 | Kollum 6 |
 
Jaorgank 2007: Kollum 1 | Kollum 2 | Kollum 3 | Kollum 4 | Kollum 5 | Kollum 6 | Kollum 7 |
 
't Griene van Triene
 

Waat ich väöraaf al vreesdje, is den toch gebäördj: ze höbbe de kraasj inne priej gehadj óm mich te passere es nuuj Prinses van Zate Hermenie RepkeTepke! ‘t Mót toch ech neet gekker waere in dees pókkegemeindje! Höbbe ze eindelik eine goodwieze kandidaat wo se dich mit ónger de luuj kéns begaeve sónger dich doaväör konstant te mótte sjame, keze ze mich dao väör zón jóng blaag die pas kömptj kieke!! Totaal gein laeveservaring, terwiel ich al van ’t hieël verke gaete höb! En bliej det se allemaol zeen, die jónges en maedjes vanne zate hermenie! Ze höbbe weer emes gevónje dae ze ’t gans jaor door kénne kommandere en es sjuttelsplak kénne gaon gebroeke! ’t Seertj hun det ze oppertied inne gate höbbe gehadj det hun det bie mich neet gelöktj woor! Mer ich vénj ’t good! Ze kloate mer get raak! ’t Zal miene tied waal doere. Mer neet strakkes bie mich kómme zumpe ómdet d’r vanalles is mis gegange!! Den soptj g’r ‘t uch aug mer zelf op! Ich haw uch gewaarsjuuwdj!!!

Mit die vastelaovesdaag zal det kéndj d’r zich nag waal doorhaer houwe. Den is  ederein toch zoa gek wie ein raad. Mer strakkes, es det Limburgs Kampioensjap väör Zate Hermenieks (LKZH) väör de däör stuitj!! Det is angere kappeskook. Den zal d’r oet ein hieël anger vaetje getaptj mótte waere en mót de kraan op ’t juste moment weer toe gedaon waere. Den zal de börgemeister, de wéthaojer van vastelaovesmeziek, de goeverneur en de gedeputeerdje van volkskultuur te waord mótte waere gestange. En ofsjoan det neet de aller slumste zeen, zoe ’t toch hénjig zeen esse den emes agter de handj höbs dae get zinnigs kéntj zégke. Dae ein bietje de taal van die luuj spruktj. En det wooltj geer die jóng blaag laote gaon doon? Gebroektj estebleef eur verstandj en bel mich taege dae tied effe. Den gaef ich mich waal oet es reserve-prinses en den regel ich daen hieële hanjel waal! Gaontj uch noe geine ónnuuëdige ambras oppe hals haole!!

Trouwes, wie zit det mit det LKZH? Det geit toch plaatsvénje in ’t wiekend van 26, 27 en 28 oktoaber es ich mich neet vergis? Höbtj geer al ein bietje ein idee wie geer det gedoons gaontj inväöle? Es det neet zoa is den höbtj geer ein vét probleem. Den zeentj geer väölste laat! Ich zoog oppe sait van die Zösterse men det geer waal al zoa slum zeentj gewaes óm väör vriedig 26 oktoaber de Janse Bagge Bend vas te ligke. Det höbtj geer good gedaon. Den wétj geer in eder geval zeker det geer tenminste eine daag van ’t fieës luuj van nivo in die tent höbtj róndj loupe. Ich num aan det oppe zaoterdig die zate hermeniekes get gaon klómmele en in ein bie väörbaat tót mislökke gedoemdje poging (dae zjurie lieëtj zich neet eder jaor ómkoupe!) gaon probere óm Limburgs Kampioen te waere. Det is den aug sjoan geregeldj en dao höbtj geer dus verder gein ómkieke mieë haer.

Mer waat gaontj geer in godsnaam oppe zóndig doon? Geer kéntj die tent den toch slech laeg laote ligke! Dao is dae klómmel väöl te duur väör! Es ich oppe zóndig noe ‘ns eine groate kienmaraton organizeerdje? Weer beginne den ’s mörges óm ein oer of tieën mit ein hoagmés inne tent. Waat ze oppe kérmis bie de bótsjuitekes kénne, mót in ein tent aug kénne. In plaats vanne kollekte ónger de més waere alvas kienkaarte en konsumpsiebónne verkoch. Nao de més ein uurke oefenkiene en den van twelf tót ein oer pauze, die ich zoe wille opvölle mit pauzekiene. Vanaaf ein oer aan ein stök door kiene óm groate prieze zoawie Mariabeeldjes, rollators en krolspange (die höb ich thoes nag ligke van destieds in Aosterberg). Óm ein oer of ach saoves houwe weer den de pin drin. Mótj geer ‘ns oplétte waat zónne daag oplevertj väör de zate hermenie!!!
’t Verveur van die kienvotte kén ich aug nach waal regele. Eine kleinzoon van mich is sjofeur bie Veolia. Dae wiltj die kieners oet de hieël gemeindje Ech-Zöstere en wuuj ómgaeving waal ophaole en trökbrénge. Mótte ze waal al saoterdigs waere opgehaoldj went mit die deensregeling van Veolia zeen ze anges sóndigs naoits oppertied inne tent. Mich liektj det waal get, det kiene!

Mer effe get anges: wo kömptj die fieëstent eigelik te staon? Toch neet oppe Nuje Mert in Ech haop ich! Dao krig geer trouwes naoits verguning väör. Die kapotte roete in ’t nuuj gemeindjehoes zeen nag altied neet vervange en hange mit get plekbandj aanein. Die kénne zoa droet sodemietere. Väöls te gevieërlik óm dao ein tent naeve te gaon zitte. En waat d’r mieë van is: geer zeentj destieds in Pej opgerich en de meiste leje kómme nag stieëds oet Groat Pej. Dus: die tent kömptj op ’t Chatelainplein in Pej te staon! De Rabo-Bank zoe dao inne waeg staon? Gein probleem! Die kéntj weg went die is/geit toch toe!! Ich huuër ’t waal!!

 
Repke Tepke 2009 (Bart Golsteijn - thambar@xs4all.nl)