Tant Triene höbbe weer liëre kènne tiejens de Echter Kirmes in oktoaber 2006. Zie woor ein geval apaart en aangezeen zie in hunne vriejetied nog get sjreef hie en dao, koos zie mesjiens ein aanvöllig zeen op dees website. D'r is begin 2007 den auch mit häör aafgespraoke det zie get kollums zoew sjrieve, väör op dees sjoan site.

Zoa gezag, zoa gedaon. Tant Triene haef ein 7-tal kollums geproduceerdj en dees zeen allemaol nog te laeze. Kiek mer ens hiejonger en aansjouw zelf waat ein gebraggel die op papier kan zitte. Nao 3 jaor te zeen ongerdaoke haef zie in 2010 de draod weeropgepakt. Mit ein nuuj serie kollums waal te verstaon die geer auch hiejonger kèntj bewonjere!

 
 
 
Jaorgank 2014: Prinsenkollum |
 
Jaorgank 2010: Kollum 1 | Kollum 2 | Kollum 3 | Kollum 4 | Kollum 5 | Kollum 6 |
 
Jaorgank 2007: Kollum 1 | Kollum 2 | Kollum 3 | Kollum 4 | Kollum 5 | Kollum 6 | Kollum 7 |
 
't Griene van Triene
 

’t Bestuur van RepkeTepke haw mich gevraogdj óm tót ane vastelaovendj eder waek get hoagwaardige, intellektuwele ónzin oet te kraome in eine kollum op hun wepsait. De vastelaovendj zit d’r op en dus bön ich eigelik klaor mit mien werk. Mer ómdet ich dit jaor gein Prinses bön moge waere bie RepkeTepke haef ’t bestuur mich aangebaoje óm nag eine kieër mien gal laeg te kótse in ein saort evaluatiekollum. Det höbbe ze neet taege de verkieërdje gezag!! Ofsjoan ich nag stieëds zit te fluite nao die vergoeding waat ich zoe kriege väör ’t sjrieve van die kollums zal ich mich nag eine kieër inne boch goaje.

Jónges en maedjes van RepkeTepke, ich höb mich uch mit die daag ‘ns bekeke vanachter de sjerme (geer höbtj mich neet gezeen, mer ich uch lekker waal) en ich mót zegke geer höbtj d’r get sjoans van gemaaktj. Op ’t PlatsSpektakel woordj geer zónger mieë ein vanne toppers. Ich wil d’r uch waal nag effe aan helpe herinnere det geer det allemaol aan mich te danke höbtj. Es ich neet oppertied oppe barrikades woor gesprónge (kiek mer in Kollum 1) hadj geer dae zaoterdig väör vastelaovendj moorzieëlig allein op ’t Ursulinenplein staon te fepe. Inne optoch van Ech veel ’t mich op det geer allemaol tegeliek begósj te blaoze en auch precies geliek weer opheeltj. Det woor sjoan väör de luuj langs de kantj. Wiste die tenminste wienieë det ’t leedje woor aafgeloupe. Ich zoog det geer inne optoch van Pej allemaol dezelfdje kantj op leeptj. Dus neet ein paar van ’t Hénge nao de Slek en de res van de Slek nao ’t Hénge. Det woor dus dudelik väör de minse langs de route. Waat geer d’r van gebakke höbtj inne Kénjeroptoch van Ech weit ich neet went dao woor ich neet biej. Toen kós ich neet ómdet de hóndj luips woor en gedéktj mós waere en det saort dinger doon ich lever zelf. Mer det zal auch waal gelöktj zeen num ich aan (dae Kénjeroptoch bedoel ich). Wie haef die nuuj Prinses ’t trouwes gedaon mit die daag? ’t Zal waal behelpe zeen gewaes, zoaes ich al verspeldje. Eige sjout. Hadj geer mer nao mich mótte loestere en mich Prinses mótte make.  

Noe det vastelaovesgehóddel agter de rök is, kéntj geer uch gaon bezig haoje mit det groat fieës det geer in oktoaber mótj organizere: ’t Limburgs Kampioensjap Zate Hermeniekes! Eine hieële móndj vol en ein hieël georganizeer. Wistj geer trouwes det zate hermeniekes de aodste verenigingen ter waereldj zeen? Inne biebel stóng al gesjreve: zij hulden zich in vreemde gewaden en liepen doelloos rond! Ich höb gehuuërdj det de vastelaovesvereniging van Ech en de fanfaar van Pej uch gaon mithelpe. Det zit dus waal good. Zeker esse bedénks det ich oppe zóndig ’t kiene organizeer. Ein kéntj duitj verder de was! Woor ’t trouwes gein good idee óm mich in ’t kommitee van aanbevaeling väör det fieës te beneume? Ich kén óntzettendj väöl luuj (väöral bie de bejaardebóndj en de Mariacongregasie) en höb ein geweldige oetstraoling. Of anges gezag: mit mich trök se vol zale. Dus effe eur verstandj gebroeke en ein wies besloet numme gaer. In eder geval hieël väöl sukses mit de organizasie van det gedoons. Ich haop det geer genóg geldj aan det fieës äöverhaotj óm uch nuuj kleijer te koupe went det blaw-gael gezoks wo geer noe mit rondj bonzoerdj sluit es ein tang op ein verke. ’t Zal uch missjien neet zeen opgevalle mer de vastelaoveskluuëre zeen road, gael en greun. Blaw-gael? Wie verzinne ze ‘t!

Ich haop det ich uch de aafgeloupe zeve waeke ’t ein en anger aan eur verstandj höb kénne peutere. Es d’r dinger wore in mien kollums die geer neet hieëlemaol begrepe höbtj, bel mich den gerös en ich lik ’t uch oet. Mien nummer stuitj in ’t tillefoonbook. Miene achternaam? Stuitje väör ’t nummer. Missjien tót volgendj jaor en de böl wah!

 
Repke Tepke 2009 (Bart Golsteijn - thambar@xs4all.nl)